August 15, 2022

LTFRB 6, may paandam sa mga isnabero nga taxi drivers!

Read Time:1 Minute, 1 Second

Iloilo City–Istrikto nga gina-implementar sang Land Transportation Franchising and Regulatory Board ukon LTFRB 6 ang ‘OPLAN ISNABERO’ campaign batuk sa mga bentahoso nga taxi drivers ilabi na subong nga holiday season.

Suno kay LTFRB 6 Legal Officer Atty. Jose Marie Lamparero, nagaguwa ang matuod nga batasan sang mga taxi drivers kon Disyembre nga wala nagadul-ong sa pasahero kon mahibaluan nga gamay lang ang ila kita kag nagapangontrata pa. Ginpanugyanan ni Lamparero ang mga taxi drivers nga mangin tampad kag sukton lang ang pasahero sa kon pila ang napagkit sa metro. Nagapati si Lamparero nga galante ang mga Ilonggo nga pasahero kon makita nga tampad kag indi suplado ang driver.

Nagpa-andam si Lamparero nga mahimo pasakaan sang kaso ang taxi driver kag operator kon mapamatud-an nga nagpangontrata sa pasahero. P5,000 ang multa sa operator kon nagpangontrata ang iya driver.

Help Desk

May ginpahamtang naman nga help desk ang LTFRB 6 sa mga malls sa syudad agud may dalangpan ang pasahero nga may reklamo batuk sa bentahoso nga taxi drivers.

Mahimo lang suno kay Atty. Lamparero nga mag-fill-up sa complaint form ang pasahero kag ipasa sa help desk agud ma-aksyonan gilayon sang LTFRB ang reklamo. (AGB)

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %

Average Rating

5 Star
0%
4 Star
0%
3 Star
0%
2 Star
0%
1 Star
0%

Leave a Reply

Previous post (UPDATE) Mag-utod nga Darryl kag Michael Odicta, ginpaguwa na sang PDEA 6
Next post Electricity bill sang Barotac Nuevo Municipal Police Station, wala nabayaran sang 10 ka bulan!