(UPDATE) Mag-utod nga Darryl kag Michael Odicta, ginpaguwa na sang PDEA 6

Iloilo City–Gin-release kahapon sa presuhan sang Philippine Drug Enforcement Agency ukon PDEA 6 ang mag-utod nga sanday Malipayon Barangay Kagawad Darryl Odicta kag Michael Odicta matapos nag-file sang petition for habeas corpus ang abogado sang pamilya Odicta.

Suno kay PDEA 6 Assistant Regional Director Levi Ortiz, ginsunod nila ang mandu sang korte base sa gin-file nga petition ni Atty. Isagani Pilas-pilas. Nagapabilin naman sa custody sang PDEA 6 si Melvin Odicta Jr alyas Vin-Vin nga subject sang search warrant sa raid sa iya balay sang nagligad nga semana.

Gin-athag ni Ortiz nga wala sang epekto sa kaso batuk sa duha ang paghilway sa ila. Ang mag-utod upod na kay Vin-Vin ang ginkasuhan sang PDEA 6 sang conspiracy for maintaining a drug den bangud sa nakuha nga sachets sang suspected shabu sa ginhimo nga raid.

Magluwas sa mag-utod nga Odicta, ginpasakaan man sang kaso sang PDEA si Atty. Marbehn Lumbo nga gintudlo ni Ortiz nga nagpasilabot sa search operation sang mga operatives sa balay sang iya mga kliyente. (AGB)