Punong Barangay Oscar Pueren sang Dumangas, gindakup matapos nakuhaan sang pusil sa raid sa balay sang negosyante

Dumangas, Iloilo–Gindakup ang punong barangay sang Barangay Calao, Dumangas matapos nga nakuhaan sang pusil samtang gina-raid ang balay sang negosyante sa iya lugar.

Suno kay PSSUPT Marlon Tayaba, head sang Criminal Investigation and Detection Group ukon CIDG 6, naga-search sila sa balay ni Ryan Catanyag sang nag-abot si Punong Barangay Oscar Pueren kag ginkwestyun ang ila ginahimo. Sang gin-usisa, nakuha sa kapitan ang 9mm pistol nga may magazine kag tatlo ka live ammunitions. Ginapatihan nga naka-inom si Pueren sang nag-abot sa balay ni Catanyag.

Nakuha naman sa balay sang negosyante ang 12-gauge shotgun, 45 kag 9mm pistols kag 38 caliber revolver, mga magazines kag bala kag holster. Suno kay Tayaba, ginserbihan nila sang search warrant si Catanyag kasunod sang mga reklamo nga masami siya nagapalupok kag nagabaton man sang ginprenda nga mga pusil.

Nag-upod sa operasyon sang CIDG 6 ang Regional Public Safety Battalion kag Dumangas police. (AGB)