Jaro ABC President Leo Lendero, nagpanugyan sa mga luyag magnegosyo sa Jaro Plaza subong nga holiday season nga mag-transaksyon sa ila opisina
Iloilo City–Nagpasalig si Jaro Association of Barangay Captains President Leo Lendero sang Barangay Our Lady of Lourdes nga hatagan sang igtalupangod ang ginpahayag nagasolobra nga suktanay sa mga kiosko sa Jaro Plaza.
Ini ang kasunod sang reklamo nga ginpalab-ut sa Aksyon Radyo Iloilo nga nagalab-ot sa P4,000 ang bayad sa arkila sang pwesto sa guwa sang plaza samtang nagalab-ot naman sa P7,500 ang bayad para sa sulod nga mga kiosko. Ginpa-athag ni Lendero nga P2,000 ang bayad para sa mga bingkahan kag food carts samtang P3,000 naman para sa mga kiosko.
Ginpabutyag ni Lendero nga nakabaton sila sang report nga may nagabakal sang mga pwesto sang kiosko nga ginabaligya naman liwat sa iban.
Nagpanugyan si Lendero sa mga luyag magnegosyo sa plaza subong nga holiday season nga magdiretso sa ila opisina agud masiguro nga legal ang transaksyon ukon wala sang patong nga dugang sa ila nga balayran. (AGB)