PDEA 6, Padayunon ang Mandate nga wala sang Kahadlok kag Pabor bisan anu pa ka Manggaranon ang ila Dakpon nga Drug personality

Iloilo City — Padayunon sang Philippine Drug Enforcement Agency ukon PDEA 6 ang ila mandate nga wala sang kahadlok ukon pabor bisan anu pa ka manggaranon ang ila dakpon nga drug personality.

Panindugan ini ni PDEA 6 Asst. Regional Director Levi Ortiz kasunod sang pag-posas kag pag-aresto nila kay Atty. Marbehn Lumbo sa pag-raid sa balay sang iya kliyente nga si Melvin Odicta Jr sa Malipayon City Proper.

Suno kay Ortiz, indi sila magduha-duha nga arestuhon kag posasan ang sin-o man nga abogado nga magsobra sa iya limitasyon sa trabaho sa masunod nga mga drug operation sang ahensya.

Ginarespeto ni Ortiz ang opinion kag sentimiento sang Integrated Bar of the Philippines ukon IBP-Iloilo chapter apang ginahimo lang nila ang ila trabaho.

Nagapati si Ortiz nga may iban nga abogado nga himoon ang tanan agud makalusot sa sala ang ila kliyente ilabe na kun manggaranon kag ma-intimidate ang mga otoridad.

Ginposasan kag gin-aresto sang PDEA operatives si Atty. Lumbo bangud sang pagpamalabag sini sa operation kag pagpamalibad nga ipadala ang mag-utod nga Odicta kag ang mga narecover nga ebidensya. (JoMaque)