Alleged plot sa pagpahalin kay Presidente Rodrigo Duterte sa puwesto, indi magmadinalag-on–Karapatan Panay
Iloilo City–Nagapati ang mga cause-oriented groups nga indi mangin madinalag-on ang plano nga pahalinon sa puwesto si Presidente Rodrigo Duterte.
Pahayag ini ni Reylan Vergara sang Karapatan Panay may kaangtanan sa report sang ginpahayag ‘blueprint’ ni former US Ambassador to the Philippines Philip Goldberg nga nagatuyo sa paguba kag pagpahalin kay Duterte sa puwesto.
Suno kay Vergara, ginalauman na nila nga may matuhaw nga plano nga kakason sa puwesto si Duterte bangud sang maisog sini nga panindugan sa isyu sang independent foreign policy. Gintumod pa ni Vergara ang pahayag sang presidente nga palayason sa Pilipinas ang American troops kag ang pagsulod sini sa peace negotiation sa mga rebelde nga wala naluyagan sang US.
Nagapabilin gihapon suno kay Vergara ang suporta sang cause-oriented groups sa Duterte administration bangud sang mga maayo sini nga programa para sa mga ordinaryo nga pumuluyo. Gin-athag naman ni Vergara nga nagaguwa lang sila agud magsaway sa mga lihok sang presidente nga ila ginapanan-aw nga indi makapa-ayo sa publiko. (AGB)