May bastante nga pondo!

Iloilo City–Nagapati ang Bayan Panay nga may bastante nga pondo ang Social Security System ukon SSS agud mahatag ang isa ka libo ka pesos nga pension hike sang mga SSS pensioners.

Suno kay Elmer Forro, secretary-general sang Bayan Panay, kinahanglan lang ang political will sang gobyerno agud mapatuman ang tikang. Ginpahayag ni Forro nga pinangabudlayan sang mga Filipinos ang ginabayad sa SSS kag wala sang amot bisan isa ka sentimo ang gobyerno gani nagakadapat lang nga ihatag ini sa nagakinahanglan ilabe na sa mga senior citizens.

Nagaguwa suno sa iya nga may 447 billion pesos nga asset ang ahensya nga mahimo gamiton para sa ginahingyo nga isa ka libo ka pesos nga increase sa SSS pension.

Ang Bayan Panay kaupod ang PISTON-Panay, Gabriela kag Kilusang Mayo Uno ang nagprotesta sa atubang sang SSS office sa City Proper kahapon agud ipanawagan ang paghatag sang isa ka libo ka pesos nga increase sa SSS pension. (AGB)