Lokal

Maasin Mayor Mar Malones kag Iloilo City Mayor Jed Patrick Mabilog, nagkomfirmar nga matambung sa ipatawag nga sinapol ni Pres. Duterte

Iloilo City — Konfirmado nga ginpatawag ni Presidente Rodrigo Duterte ang mga mayors sa bug-os nga pungsod sa malacañang buwas.

Suno kay Department of Interior and Local Government (DILG) 6 Director Anthony Nuyda, gilayon nila nga ginpadal-an sang notice ang tanan mayors nga magtambung sa meeting.

Natalana buwas sa hapon ang meeting ni Duterte sa mga mayors sa Visayas kag Mindanao.

Nakahanda naman si Maasin Mayor Mariano Malones nga makigkita kay Presidente Duterte.

Ginkonfirmar ni Malones nga nakabaton siya sang communication halin sa League of Municipalities of the Philippines kag DILG para sa meeting upod sa presidente sa Malacañang.

Suno kay Malones, mas maayo nga maka-istorya siya liwat sa presidente agud matinluan na ang iya pangalan sa isyu sang illegal drugs.

Ginpasiguro man ni Iloilo City Mayor Jed Patrick Mabilog nga makadto siya sa Malacañang buwas.

Wala naman nakahibalo ang alkalde kon ano ang agenda sang meeting.

Sanday Malones kag Mabilog upod kanday Calinog Mayor Alex Centena kag Carles Mayor Seigfred Salagunting-Betita ang nalakip sa narco list nga ginlawag ni Duterte sang Agosto sang nagligad nga tuig.

Lunsay ginpanginwala sang mga namitlang nga mayors nga protector sila sang illegal drugs. (JoMaque)

Leave a Reply