Ex-Bombo anchor kag subong Barangay Kagawad Edwin de Pedro, nagapati nga nangin ‘sacrificial lamb siya sa isyu sang illegal drugs’

Nagapati si ex-Bombo anchor kag subong Barangay Edwin de Pedro sang Talisay City, Negros Occidental nga nangin sacrificial lamb siya sa isyu sang illegal drugs.

Ini matapos nga gin-identify siya ni Ricky Serenio, ang high value target level 3 kag finance officer sang Beria Drug Group sa Bacolod City, nga isa sa mga ginhatagan niya sang payola nga P50,000 kada semana. Suno kay de Pedro, na-identify lang siya ni Serenio matapos ginpakitaan sang litrato halin sa iya Facebook account. Tatlo sila suno kay de Pedro nga ex-Bombo halin sa isa ka barangay.

Duha ka taga-Bombo ang ginsugid ni Serenio nga ginhatagan niya sang kwarta pero ang iya lang nga litrato suno kay de Pedro ang ginpakita.

2007 sang nagresign sa Bombo Radyo-Bacolod si de Pedro kag nagsulod bilang media relation officer sa isa ka coffee company.  2009 sang nagpadalagan siya nga barangay kagawad kag nagdaug.

Ginapanindugan ni de Pedro nga wala gid sila nakakit-anay kag nakasugat-anay ni Serenio. Plano ni de Pedro nga mag-file sang kaso batuk kay Serenio agud mapuwersa ini nga pamatud-an sa korte ang iya alegasyon. (AGB)