Mayor Jed Patrick Mabilog, nag-ako nga nalawagan ni Presidente Rodrigo Duterte sa ila meeting sa Malacañan
Iloilo City — Gin-ako ni Mayor Jed Patrick Mabilog nga nalawagan siya ni Presidente Rodrigo Duterte sa ila meeting sa Malacañan sang Mierkules sang hapon.
Suno sa alkalde, may ginmuno pa ang presidente nga paryente niya nga drug personality apang wala man ini sang kamatuoran.
Importante suno kay Mabilog nga nahibaluan sang presidente nga nagatinguha siya agud matapna ang illegal nga druga sa syudad. Una na ginpabutyag ni Mabilog nga mangayo siya sang bulig sa presidente sa kampanya kontra illegal nga druga sa syudad.
“Absent”
Lima ka mga alkalde sa probinsya sang Iloilo ang wala nakatambung sa sinapo.
Ginkumpirmar ni Ajuy Mayor Jett Rojas, presidente sang League of Municipalities of the Philippines ukon LMP-Iloilo Chapter, nga kalakip sa mga absent sanday:
- Passi City Mayor Jesrey Palmares;
- Leganes Mayor Adolf Jaen;
- Calinog Mayor Alex Centena;
- Guimbal Mayor Oscar Garin; kag
- Pavia Mayor Mike Gorriceta.
Ginrason ni Mayor Palmares nga gin-trangkaso siya bangud sang pagpulaw bantay sa Jalaur River sang gab-i antes ang meeting. Nagmasakit man si Mayor Jaen samtang na-ospital si Mayor Centena bangud sa pneumonia. Gin-atake naman sang allergic rhinitis si Mayor Garin samtang may biyahe sa abroad ni Mayor Gorriceta. (JoMaque)