Lokal

Ambulansya, nagtakilid matapos nabungguan sang awto; mga sakay sang ambulansya, nasamaran!

Iloilo City–Pilason ang mga sakay sang ambulansya nga nagtakilid sang nabungguan sang awto sa Taft North, Mandurriao kahapon sang hapon.

Suno kay PO3 Alfredo Masamong, traffic investigator sang Mandurriao Police Station, isaylo sa laina nga ospital halin sa Western Visayas Medical Center ang pasyente nga si Narciso Miser, 84-anyos sang Zarrague, Pototan nga gin-atake sa corazon. Mahingagaw kuntani ang driver sang ambulansya nga si Rolando Goboyan agud madala gilayon ang pasyente sa ospital apang nabungguan sang awto nga ginamaneho ni maria Glenda Ycoy. Pa-athag naman ni Ycoy, wala niya nabatian ang wangwang sang ambulansya kag green naman ang traffic light gani nag-abante siya.

Na-ospital bangud nasamaran ang pasyente nga si Miser kag ang iya apat ka himata. Nabagrasan man ang resident doctor sang WVMC nga kaupod sa ambulansya pero nakaguwa na sa ospital. Nagpanalakit man ang lawas sang driver sang ambulansya.

Samtang nagpa-ospital man ang driver sang awto bangud nga nagsaka ang blood pressure. (AGB)

Leave a Reply