Desamparados Punong Barangay Noemi Jablo, inosente sa isyu sang illegal drugs suno kay Councilor Jeffrey Ganzon

Iloilo City–Inosente si Desamparados, Jaro Punong Barangay Noemi Jablo sa isyu sang illegal drugs base sa rekomendasyon sang Committee on Dangerous Drugs sa City Council nga nag-imbestigar sa tatlo ka barangay kapitan nga ginpahayag nagpabaya sa anti-drugs campaign.

Suno kay Councilor Jeffrey Ganzon, chairman sang komitiba, kun basehan ang mga ebidensya nga ginhatag sang PDEA kag PNP kag sa ginpangsugid ni Jablo sa executive session, napamatud-an nga wala sang kaangtanan ang kapitan sa illegal nga druga. Nagaguwa suno kay Ganzon nga wala sang Jablo ang nabutang sa PDEA kag PNP watchlist rason nga wala man ginbutang sang punong barangay ang iya mga himata sa BADAC report.

Ginpabuyag man sang punong barangay nga indi residente sang Desamparados, Jaro kag indi niya himata ang yara sa PDEA watchlist nga si Rommel alias Rampart Gregori.

Samtang wala naman ginbutang nanday Bakhaw, Mandurriao Punong Barangay Remia Prevendido-Gregori kag Monica, City Proper Punong Barangay Keith ‘Dabing’ Espinosa sa BADAC report ang ila mga himata. Ginpahayag ni Ganzon nga ginatugyan nila sa city DILG kun ano ang pagahimuon kanday Gregori kag Espinosa.

‘Wala sang disciplining authority’

Gin-athag naman ni city DILG Director Atty. Ferdinand Panes nga wala sang disciplining authority city DILG sa mga punong barangay nga ginpahayag involved sa illegal drugs.

Gin-athag ni Panes nga sa idalum sang Local Government Code, ang City Council ang may disciplining authority sa mga elected barangay officials.  Apang indi maka-dismiss sa barangay officials ang Sangguniang Panlungsod kundi mahimo lang makasuspender sa kapitan sa sulod sang anum ka bulan nga wala sang sweldo. (AGB)