‘Na-overlook’
Iloilo City–Na-overlook sang Philippine Drug Enforcement Agency ukon PDEA 6 ang pangalan sang himata ni Desamparados, Jaro Punong Barangay Noemi Jablo gani wala nalakip sa drug watchlist sang ahensya.
Suno kay PDEA 6 Assistant Regional Director Levi Ortiz, yara sa suspense files ang pangalan ni Ryan Jablo alyas Arsaf. Pa-athag ni Ortiz, ang suspense files nagabug-os sang mga aliases sang mga drug personalities nga gina-validate kag gina-verify sang ahensya.
Kun kompleto naman ang data kag makonfirmar nga drug personality, ginasaylo ang pangalan sa watchlist. Nahibaluan lang suno kay Ortiz ang matuod nga identity ni Ryan Jablo sang natiruhan siya sa Jaro.
Posible suno kay Ortiz nga nalipatan sang PDEA operatives nga isaylo si Jablo sa drug watchlist gani wala man nalakip sa ginpakita nga listahan sang PDEA sa mga konsehal.
Samtang pangabayon ni Councilor Plaridel Nava si Councilor Jeffrey Ganzon, chairman sang Committee on Police Matters sang City Council, nga maghiwat liwat sang executive session kon ma-amendaran na sang PDEA 6 ang ila drug watchlish. Imbitaron man liwat si Punong Barangay Jablo suno kay Nava agud pangayuan sang paathag kun ngaa wala niya nalakip sa BADAC report ang iya bayaw.
Nagapati si Nava nga makumbinser niya ang mga kaupdanan nga buksan liwat ang imbestigasyon bangud wala pa sang finality ang ila committee report kag subject pa sa deliberation sang City Council. (AGB)