PCSO, nagtanyag sang masobra P61 milyones nga Presumptive Monthly Retail Receipts Sa Iloilo Small Town Lottery and Gaming Corporation

Iloilo City – Naglab-ot sa 61 million 500 thousand ang ginpangayo nga presumptive monthly retail receipts sang Philippine Charity and Sweepstakes Office ukon PCSO sa Small Town Lottery and Gaming Corporation agud makapadayon sang ila operation subong nga tuig. Ini ang pahayag ni Arnel Asuturias, Representative sang STL and Gaming Corporation.

Suno kay Asturias, nakigsapol sa tanan nga mga operators sang STL si Remelita Gabuyo, representante sang PCSO sadtong Disyembre sang nagligad nga tuig kag ginpahayag nga may tag onse ka STL operators nga tuyo magdumala sang STL sa syudad kag probinsya.

Kinahanglan nga tupungan ukon labawan sang STL and Gaming Corporation suno kay Asturias ang ginpangayo nga PMRR sang PCSO agud makapadayon sa ila operation apang ginpabutyag sini nga indi nila ini masarangan.

Nagpadala sang sulat ang tagdumala sang STL and Gaming Corporation sa PCSO agud ikonsidera ang ginpahayag una na nga ginkasugtan nga computation nga naglab-ot lang sa 17 milyunes tubtob 18 milyunes pesos nga PMRR.

Ginpataasan pa gid sa 25 milyunes pesos sang STL and Gaming Corporation ang PMRR apang wala gihapon sang komunikasyon halin sa PCSO suno kay Asturias may kaangtanan sa ila apela.

Ginpahayag naman ni Asturias nga may nabaton siya nga dokumento sa diin naaprubahan na sang PCSO ang isa ka operator nga magdumala sang STL sa syudad.

Aljohn Torreta