Signals sang tanan nga cellphone networks sa pila ka lugar sa syudad, gin-utod bilang kabahin sang security measures sa Dinagyang Festival

Iloilo City — Para sa seguridad sang publiko. Ini ang gintumod nga rasun ni Iloilo City Police Office (ICPO) Director Remus Zacharias Canieso sa pag-utod sang signals sang mga cellular phone networks sa pila ka mga lugar sa syudad sa pagsaulog sang Dinagyang Festival.

Suno kay Canieso, gina-antisipar sang ICPO ang tanan nga posibilidad nga magluntad ang mga insidente sa kahiwatan.

Naghingyo ang ICPO suno kay Canieso sa National Telecommunications Commission (ICPO) nga temporaryo nga utdon ang signal sang Smart, Globe kag iban pa nga mga telecommunication networks sa mga activity areas subong nga adlaw tubtob bwas.

Magasugod sa alas 6 sa aga tubtob alas 2 sa hapon ang pag-utod sang signal sa tanan nga cellular phone networks.

Una na ginpahayag sang Smart kag Globe nga temporaryo nila nga i-blocked ang ila nga serbisyo sa pila ka mga lugar sa pagsaulog sang Dinagyang Festival.

Base sa gin-isyu nga advisory sang Smart, maapektuhan ang Plaza Libertad, Freedom Grandstand, Dalan Quezon, Iznart kag Rizal, Iloilo Business Park, Esplanade 1 kag 2, Atria, Plazuela kag SM City.

Sa mga Globe users, indi naman makatext, tawag kag makagamit sang mobile data sa City Proper, Mandurriao, Jaro, Lapaz kag Bo. Obrero base sa ginpaguwa nga advisory. (JoMaque)