UPDATE: Kaso nga murder, ipasaka sa mga suspek sa pagpangbuno sa Calinog nga nagpatay sang apat ka tawo
Calinog, Iloilo–Natalana nga ipasaka ang kaso nga murder subong nga adlaw batuk sa mga suspetsado sa pagpangbuno nga nagpatay sang apat ka tawo sa atubang sang Calinog Central Elementary School sang Sabado sang gab-i.
Ini ang pahayag ni PSI Kennith Bermejo, Acting Chief of Police sang Calinog Police Station. Suno kay Bermejo, ginatudlo sang mga testigo si Ernie Ganancial,26-anyos sang Poblacion, Delgado nga nagbuno-patay kanday Ronald Fernandez, 44-anyos sang Tabucan, Calinog kag SPO4 Nilo Campos, deputy chief sang Calinog Police Station nga nagresponder sa insidente.
Padayon naman ang imbestigasyon sang Calinog police agud mabal-an kun sin-o ang nagbuno-patay kanday Elmer Amorin kag Nemia Ganancial, 53-anyos Brgy. Poblacion Delgado nga iloy sang suspetsado nga si Ernie Ganancial.
Nadakpan si Ganancial kag ang iya pakaisa nga si Cyril Cerbas sa sa hot pursuit operation samtang nagsungka ang anum pa kahapon.
Padayon naman ang imbestigasyon sang Calinog police agud makilala kag madakpan ang wala pa makilal-an nga suspetsado nga ginpahayag angkas ni Ernie Ganancial sa motorsiklo antes ang insidente. (AGB)