Mga suspek sa stabbing incident sa Calinog, ginpasakaan na sang kaso

Iloilo City —  Gin-ako ni Elbert Ganancial ang tanan nga responsibilidad sa pagpangbuno sa Calinog sang Sabado sang gab-i sa diin apat ang napatay lakip ang iya iloy kag ginapa-abswelto ang iban nga suspek.

Suno kay Elbert, 28, siya ang nagbuno sa mga biktima.

Ginpasaka na kahapon ang kaso nga qualified direct assault with murder batuk kay Elbert upod kay Chyrel Cerbas, 37 anyos. Dugang nga kaso nga parricide ang ginfile batuk kay Elbert.

Ginpasakaan naman sang kaso nga 2 counts of murder ang manghud ni Elbert nga si Ernie, 26 anyos upod kanday Van Castañaday, 31; Ryan Sioco, 25; Joven Celeste; Renato Casalmer, 49; Ruben Celso, 47 kag isa ka John Doe.

Napatay sa pagpangbuno ang iloy nanday Elbert kag Ernie nga si Nemia; si SPO4 Nilo Campos nga deputy chief sang Calinog Police Station; kag mag-abyan nga Ronald Fernandez kag Elmer Amorin.

Una na ginhambal ni Senior Inspector Kennith Bermejo, acting chief sa Calinog Police Station, nga ginatudlo sang testigo nga masobra isa ang suspek sa pagpangbuno. (JoMaque)