Gov. Art Defensor, naga-sentimiento sa kapaltahan sang PCSO nga magpabalo antes magdihon sang bag-o nga IRR sa pag-operate sang STL

Iloilo City — (UPDATE)  Mas maayo kuntani nga nagpabalo ang Philippine Charity Sweepstakes Office ukon PCSO nga ilisan nila ang implementing rules and regulations sa pag-operate sang Small Town Lottery.

Sentimento ini ni Governor Arthur Defensor matapos nakita nga gamay ang share sang local government unit kag Philippine National Police sa STL operation sa bag-o nga IRR.

Suno sa gobernador, nagkonsulta kuntani ang PCSO sa League of Municipalities, League of Cities kag League of Governors sa pungsod antes gin-ilisan ang IRR.

Magluwas sa gamay nga share sa kita, ginkakasan man ang local chief executive sang prerogative nga mag-isyu sang certificate of no objection sa naga-apply nga operator sang STL.

Sang damlag lang, nag-courtesy call kay Defensor si Samuel Aguilar, chief operating officer sang Eagle Crest Holding and Gaming Corporation nga ginhatagan sang franchise agud mag-operate sang STL sa probinsya sa labing una nga tiun. (JoMaque)