Suspek nga nagpatay kag nagsunog sa tag-iya sang calibration shop sa Jaro sang 2015, nadakpan sa Negros Occidental

Iloilo City — Nadakpan sang gintingub nga puwersa sang CIDG-Negros, Hinigaran kag Jaro police ang suspetsado nga nagpatay kag nagsunog sa tag-iya sang JD Calibration Shop kag iya live-in partner sa Tagbak, Jaro sang 2015.

Suno kay Chief Inspector Rey Cuanico, OIC sang Bacolod City CIDG kag Chief of Operations sang CIDG Regional Office 18, naaresto si Ruben Villaleon, 36-anyos sa Brgy. Himaya, Hinigaran, Negros Occidental.

Wala na nakapalag pa si Villaleon nga nakibot pa sa presensya sang mga police operatives.

Gindakup si Villaleon bangud sa warrant of arrest sa kaso nga Robbery with Homicide nga gin-isyu ni Judge Guilje Delfin Lim, Presiding Judge sang RTC Branch 22 sa Iloilo Hall of Justice.

Si Villaleon ang caretaker sang shop nga gintudlo nagpatay sa iya amo nga si Jose Daliva kag ka-live in nga si Girlie Alabaran. (JoMaque)