Daan nga hiligut-anon, ginapatihan rason sang pagtiro sa 70-anyos nga lalaki sa Mina
Mina, Iloilo–Pilason ang 70-anyos nga lalaki sang gintiro sang iya kasilingan sa Purok 2 Brgy. Agmanaphao kagab-i.
Suno kay PSI Ma. Theresa Liro, hepe sang Mina Police Station, daan nga hiligut-anon ang ginatudlo motibo sa insidente. Base sa pagpangusisa sang mga pulis, masami ginapasibangdan sang suspek nga si Arnulfo Nograles, 64-anyos sang amu nga lugar, nga ginakuha sang biktima nga si Rodolfo Preyor ang iya mga tanum nga utanon. Antes ang insidente, ginpa-andaman pa sang suspetsado ang biktima nga indi mag-agi sa atubang sang iya balay.
Apang sang nahibaluan sang suspect nga naglabay ang biktima, ginsunod niya ini kag gintiro.
Naigo sa tuo nga parte sang likod ang biktima kag naglapos sa dughan. Padayon nga ginabulong sa Pototan Provincial Hospital ang biktima samtang at-large ang suspetsado. (AGB)