Mga menor-de-edad kag ati nga nagapa-amulya sa bakante nga lote sa Laguda, Lapaz, plano sang mga barangay officials nga pahalinon!
Iloilo City–Nagaplano ang mga barangay officials sang Barangay Laguda, Lapaz nga pahalinon ang mga menor-de-edad kag mga ati nga nagapa-amulya sa bakante nga lote sa barangay.
Suno kay Punong Barangay Dale Jalandoni, madugay na nga problema ang mga menor nga naga-istambay kag nagasimhot sang rugby apang nagabalik man gihapon kun ginasaway kag ginapapuli. Napalab-ot man niya sa DSWD-Lapaz ang problema kag nagalaum nga ma-aksyonan gilayon.
Wala naman sang ideya si Jalandoni sa impormasyon nga may pila man ka mga estudyante nga naga-istambay sa lugar kag mag-sex. Sa impormasyon nga nakalab-ot sa Aksyon Radyo Iloilo, daw wala lang sang labot ang mga estudyante nga maghimo sang kamala-malahan sa lugar samtang nagasuksok pa sang uniporme kag nagakatabu halin alas-4 sa hapon tubtub sa gab-i.
Sa nahibaluan ni Jalandoni, naga-istambay lang sa waiting shed ang mga estudyante kag wala na ginapatiner sa lugar bangud sang curfew. (AGB)