‘NO COMMENT NA’
Iloilo City — (UPDATE) Gindumilian ang mga official kag empleyado sang Western Visayas Medical Center nga maghatag sang anuman nga komento kag opinyon angut sa internal audit report sang Department of Health ukon DOH.
Base ini sa memorandum order no. 11 series of 2017 nga ginpaguwa ni WVMC OIC Medical Chief II Dr. Ma. Cristina Woo sang Enero 27.
Magapangatubang sang administrative sanctions sa idalum sang Civil Service Law and Rules ang sin-o man nga opisyal kag empleyado nga madakpan naglapas sa mandu.
Sang Enero 18, nagpaguwa man sang Memorandum Order No. 16 series of 2017 si Dr. Woo nga nagapahayag nga indi maghatag sang kopya sang mga kontrata ilabe na sang mga bid documents kag kapareho nga records agud matapna ang mga unauthorized users nga maka-access sa nasambit nga impormasyon.
Apang puwede man maka-access ang publiko sa mga impormasyon kun mag-diretso lang sa opisina ni Dr. Woo.
Gintugyan nanday Chief Administrative Officer Esther Nievales kag Chief Pharmacist Lanie Capaque kay DOH Secretary Paulyn Jean Ubial ang pagsabat sa anuman nga inquiries sa mga isyu sa ospital.
Sa internal audit report sa DOH, natukiban nga wala nag-agi sa bidding ang multi-year contract sa chemo-dialysis sang WVMC kag ang consignment sang mga bulong sa ospital. (JoMaque)