ArchivesLokal

Manugbaligya sang bulak sa Iloilo Central Market, patay matapos ginpahayag gin-atake sang high blood

Iloilo City — Napatay ang manugbaligya sang bulak sa Iloilo Central Market nga ginpahayag gin-atake sang high blood kahapon.

Suno kay Gemma Tacosalme, asawa sang napatay nga si Joaquin Sacman Jr, 68 anyos sang Libertad Lapuz, gin-atake sang balatian ang iya bana samtang nga nagpangakig si Local Economic Enterprise Office (LEEO) head Ariel Castañeda kahapon sang aga.

Ginpahayag nga naghambal si Castañeda nga ipanghaboy niya ang mga bulak kon indi paghimuson.

Ginpanindugan ni Tacosalme nga naglisensya sila sa market-in-charge sa central market nga mag-extend sang ila kiosko sa Guanco area.

Pero nag-abot suno sa iya si Castañeda kahapon kag akig ang tingog nga kuhaon ang ila gin-extend nga tent.

Suno kay Tacosalme, ginpahalin niya ang iya bana samtang nagapangakig si Castañeda pero gintundaan na lang siya nga gin-atake ini sa sulod sang central market.

 

‘Temprano pa gin-atake’

Nanginwala si LEEO head Ariel Castañeda nga gin-atake sang high blood ang nagabaligya sang bulak sa Iloilo Central Market nga napatay gid sa ospital matapos nga ginsaway niya nga kakason ang ila gin-extend sa puwesto kahapon sang aga.

Suno kay Castañeda, temprano pa sang gin-atake si Joaquin Aacman antes siya nagkadto sa pwesto sini.

Sa pagkamatuod suno kay Castañeda, siya pa ang nagtawag sa taga-ICER agud madala sa ospital si Sacman bangud nga natumba sa fish section.

Gin-ako ni Castañeda nga nagpanaway siya sa mga nagbutang sang extension sa indi nadesignar nga lugar.

Nanginwala si Castañeda nga naghambal siya nga ipanghaboy ang mga bulak nga baligya nanday Sacman.

Ang iya ginhambal suno diri, siya ang manglimpyo kon indi nila pagtinluan ang extension. (JoMaque)

 

Leave a Reply