Bangkay, nasapwan sa tunga sang talamnan sa Oton
Oton, Iloilo–Nasapwan nga patay na sa tunga sang talamnan sa Brgy. Bita Sur, Oton ang 27-anyos nga lalaki kaina nga hapon.
Ginkilala ini kay Anaceto Ambat sang Tagbac Sur, Oton. Suno kay PO3 Joey Lauron sang Oton Police Station, posible nga ginlampusan sa ulo si Ambat bangud nagapalanggit-um ini sang nasapwan kag may pilas sa ulo.
Ginpahayag naman sang iloy ni Anaceto nga si Jocelyn Ambat nga nagapang-amo ang iya bata kay Pablo Olivares kag nagbulig ini kagab-i sa pagluto sang pagkaon sa balay ni Olivares bangud nga bisperas sang Fiesta sang Barangay Bita Sur. Nagkadto man sa baylehan kagab-i si Anaceto apang wala na nakapauli.
Gina-imbestigaran na sang Oton police ang motibo sa natabu. (AGB)