Association of Taxi Operators in Panay, indi mag-upod sa ginaplano nga transport holiday sang mga jeepney operators

Iloilo City — Indi mag-upod sa ginaplano nga transport holiday sang mga public utility jeepneys ang Association of Taxi Operators in Panay ukon ATOP.

Suno kay ATOP president Perfecto Yap, counter productive ang tikang sang mga PUJ operators nga nagatuyo pamatukan ang plano nga pag-phase out sang mga depasahero nga jeep nga naga-edad sang masobra 15 ka tuig.

Gin-athag ni Yap nga suportado nila ang ginapakigbato sang PUJ operators pero indi lang sila mag-upod sa transport holiday bangud madulaan sang kita ang mga taxi drivers.

Una na ginpabutyag ni PISTON Panay President Edgar Salarda nga mahiwat pa sang press conference ang mga transport groups agud i-anunsyar ang fetsa para sa isa ka adlaw nga transport holiday. (JoMaque)