Numero sang mga menor de edad nga nakahimo sang krimen sa Syudad, naglab-ot na sa 113
Iloilo City — Naglab-ot sa 113 ang numero sang mga menor de edad nga nakahimo sang krimen sa syudad halin Enero 2016 tubtub Pebrero 2017.
Base ini sa record sang Women and Children’s Protection Desk (WCPD) sang Iloilo City Police Office (ICPO).
29 naman ka mga gang ang naga-egsister sa syudad kag amat-amat nga gina-tokhang ukon ginakadtuan sa ila mga balay agud istoryahon upod ang ila ginikanan nga mag-untat na sa pagpanggamu.
Suno kay Senior Inspector Marie Faith Superio, chief sang WCPD, masobra na sa 100 ka mga miembro sang gang ang nagkomiter nga indi na maghimo sang gamu.
May impormasyon man ang WCPD nga may mga miembro sang gang ang indi na makit-an sa syudad bangud ginapapalagyo sang ila ginikanan.
May ginapatuman nga programa ang WCPD para sa mga gang members nga nagapa-intiendi sang mga laye kag mga konsekuwensya nga ila madangatan sa tion nga maghimo sang kalainan. (JoMaque)