Pito ka pamatan-on nga miembro sang Cool Kids Gang, ginkasuhan matapos gintudlo nga nagsapote kag nagbuno sa service crew sang fast food chain

Iloilo City–Ginpasakaan na sang kaso ang pito ka mga miembro sang Cool Kids Gang nga ginatudlo nagsapote kag nagbuno sa service crew sang Jollibee fast food chain sang Pebrero 19 sang kaagahon.

Kaso nga frustrated murder ang gin-file kanday Micheal John Fernandez, 18-anyos; Chad Palmares, 18; Anthony Jacosalem, 18; Manly Flores, 19, tanan sang Punong, Lapuz; Ron Paulo Miras, 21-anyos sang Barangay Rizal, Lapuz kag duha ka mga lalaki nga naga-edad sang 16-anyos.

Nagapabilin ng preso sa karsel sang Police Station 1 ang lima ka mga suspetsado samtang ginturn-over sang Women and Children’s Protection Desk sa Balay Dalangpan sa Bo. Obrero ang duha ka menor-de-edad.

Nagabantay sang salakyan ang biktima nga si Leonyr Ayalin, 22-anyos sang San Isidro, Lapaz malapit sa old provincial capitol sang ginlagas sang napulo ka mga lalaki kag ginbuno. (AGB)