UPDATE: Mga barangay officials sa Santiago, Barotac Viejo, nagaplano nga magpatawag sang assembly agud istoryahan ang reports sang tuyo nga pagsaka sang wala makilala nga mga tawo sa mga balay
Barotac Viejo, Iloilo–Plano sang mga barangay officials sang Barangay Santiago nga magpatawag sang assembly agud ma-istoryahan ang mga reports sa tuyo nga pagsaka sang wala makilala nga mga tawo sa mga balay.
Suno kay Reyland Vergara sang Karapatan kag tumandok sang Barangay Santiago, naghatag sang kulba sa mga residente ang tuyo sang wala makilala nga mga tawo. Sa pagkamatuod suno sa iya, may ginlagas na ang mga tanod nga mga lalaki nga nagpalagyo sa bukid. Bisan ang mga pulis suno sa iya naglighot sa kasi-utan.
May nakit-an suno kay Vergara ang mga naglagas nga tanod nga area sa bukid nga may ginlutuan, may tinanok nga saging, bulong kag iban pa nga kagamitan. Sa nasambit nga lugar ginapatihan nga nagpanago ang mga lalaki pero wala man sila nakit-an.
Dugang ni Vergara, may impormasyon man nga may nagdungka nga pumpboat sa baybayon sang nagligad nga adlaw kag nakita ang mga sakay nga nagsaka padulong sa Mount Opao.
Nagapangabay si Vergara sa kapulisan nga indi pagbalewalaun ang amo nga mga reports.
‘Wala nagapabaya’
Ginpasiguro naman ni Barotac Viejo Mayor Beng Tupas nga wala nagapabaya ang kapulisan agud masiguro ang kaluwasan sang mga pumuluyo sa banwa.
Magluwas sa Barangay Santiago, una na nareport ang punong barangay sang San Antonio nga may mga balay gid man nga gintuyo sakaun pero wala naabtan sang mga nagresponder nga tanod sang Pebrero 26 kag 27 kag Marso 1.
Ginpanugyanan ni Mayor Tupas ang mga pumuluyo nga mag-aligmat kag gilayon magreport sa mga pulis kon may masiplatan nga makaduluda nga tawo sa ila barangay. (AGB)