3 ka mga suspetsado nga gintudlo nagdala sa magnobyo, nag-carnap sa salakyan kag nag-molestya sa babaye nga biktima, ginpasakaan na sang kaso

Iloilo City — Ginpasakaan na sang kaso ang tatlo ka mga suspetsado nga gintudlo nag-abduct sa magnobyo, nag-carnap sang salakyan kag nag-molestya sa babaye nga biktima.

Gindala sa Iloilo Hall of Justice kaina sang aga ang mga suspects nga sanday Sirius Gim Villareal, 22-anyos sang Tigbauan; Raymond Cordero, 22 kag Robert Tingson, 30 anyos lunsay sang Amamaros, Pototan.

Nagpadulong man sa hall of justice ang magnobyo nga biktima kaupod ang ila pamilya.

Carnapping with serious illegal detention and grave threats ang gin-file sang 4^th maneuver platoon batuk kanday Villareal, Cordero kag Tingson.

Ang 4^th Maneuver Platoon amu ang nagbulig sa paglagas sa mga suspects sang nagpangayo sang bulig si alyas Princess.

Ginkasuhan man si Villareal sang illegal possession of firearm matapos narecover sa iya ang 12 gauge shotgun kag isa ka bala sang ini ang nadakpan.

Dugang pa gid nga kaso nga rape by sexual assault ang gin-file sang Women and Children Protection Desk sang Mandurriao Police Station batuk kanday Villareal kag Cordero matapos nahibaluan nga gin-molestyahan si alyas Princess.

Ginpahayag nga may isa pa ka kaso nga iga-file ang Mandurriao Police Station batuk sa mga suspetsado apang ginahitso pa ang mga dokumento. (JoMaque)