(UPDATE) Isa pa ka suspek sa pag-abduct sa magnobyo sa Iloilo City, nagsurrender!
Iloilo–Nagsurrender kagab-i si Robert Tingson sang Amamaros, Pototan, isa pa sa mga suspects sa pag-abduct sa magnobyo sa car park sang SM City.
Nagsurrender si Tingson kay PCI Charlie Sustento, hepe sang Ajuy Police Station kag leader sang Iloilo Provincial Police Office-Special Operations Group Team Charlie. Suno sa iloy ni Tingson nga si Teresa, nagpauli ang iya bata mga alas-8 sang gab-i sang Marso 6 sang gab-i.
Si Tingson ang gintudlo nga kaupod nanday Sirius Gim Villareal sang Barangay 7, Tigbauan kag Raymond Cordero sang Amamaros, Pototan nga nagpanaug sa Zarraga samtang nagdiretso ang duha kaupod ang mga biktima sa Banate.
Pasakaan sang kaso ang mga suspek subong nga adlaw. Si Villareal ang ginturn-over sa Iloilo District Jail sa Pototan bangud may kaso nga rape batuk sa iya nga ginfile sang 2015. Preso naman sanday Cordero kag Tingson sa Mandurriao Police Station. (AGB)