18-anyos nga estudyante nga babaye sa Iloilo City, nagreport nga gintuyo i-abduct!

Iloilo City–Makilala sa itsura sang 18-anyos nga estudyante ang lalaki nga ginpahayag nagtuyo mag-abduct sa iya halin sa Tabuc Subam Jaro pakadtu sa Bitaog-Taytay, Sta. Barbara kagab-i.

Suno kay alyas Jen, nagpakilala ang suspetsado nga security guard sang University of San Agustin kag ginhaylo siya nga magsakay sa motorsiklo. Bangud indi saulado sang biktima ang lugar, nagpasugot siya kag nagsakay sa motorsiklo sang lalaki sa pagpati nga idul-ong siya sa restaurant nga ginahiwatan sang debut sang iya pakaisa sa General Luna, City Proper.

Apang natingala si jen nga lain na ang alagyan nga gina-usoy sang motorsiklo.

Nakamutik ang biktima nga may malain nga plano ang suspetsado sang nagpatughong ini sa gasolinahan kag nag-agi sa circumferential road pakadtu sa Sta. Barbara. Pag-abot sa liku-on nga parte sang Brgy Bitaog-Taytay, naka-tsansa si Jen nga maglumpat sa motorsiklo kag nagdalagan agud magpangayo sang bulig.

Nagpanaog pa suno sa iya sa salakyan ang lalaki kag gintuyo siya nga lagson apang nakita sini nga malayo na siya kag nakapangayo sang bulig.

Ginlaragway sini ang suspetsado nga maputi, maniwang, 5 tubtub 5’2 ang height kag ginabanta naga-edad sang 30 tubtub 35-anyos. (AGB)