Businessman Rommel Ynion, nagbuyagyag sa ginpahayag tuyo nga pagpapatay ni Cong. Treñas kay Councilor Plaridel Nava
Iloilo City — Gin-ako ni businessman Rommel Ynion nga siya ang source sang gin-post ni Councilor Plaridel Nava sa ginpahayag tuyo nga pagpapatay ni Congressman Jerry Treñas sa konsehal paagi kay PDEA 6 identified drug group leader Melvin Odicta.
Suno kay Ynion, nagkadtu siya sa balay ni Odicta sang campaign period sang nagligad nga tuig agud maklaruhan sa isyu nga tuyo man siya sini ipapatay.
Samtang naga-istorya sila, nag-ring ang telepono ni Odicta kag ginpakita sini kay Ynion nga nakabutang nga Congressman Treñas ang nagatawag.
Ginbutang ni Odicta sa speaker phone ang telepono kag nabatian ni Ynion ang tingog pareho kay Treñas nga nagapangumusta kay “pulok-pulok.”
Suno kay Ynion, ginsugid sa iya ni Odicta nga si Nava ang ginatumod nga “pulok-pulok” kag ginaplano na sang grupo nga patyon.
Ginkuwestyun naman ni Ynion kon ngaa wala si Treñas sa drug list nga ginpaguwa subong sang administrasyon bangud base sa iya nakita sang nagkadtu siya sa balay ni Odicta, nakita niya didto ang mga tawo sang kongresista.
“Indi ko kilala si Mr. Odicta”
Ginpanghiwalal ni Cong. Treñas nga kilala niya si the late PDEA 6 identified drug group leader Melvin Odicta.
Pagtadlong ini sang kongresista matapos gin-post ni Councilor Nava sa facebook nga tuyo siya ipapatay ni Treñas base sa ginsugid ni Ynion sang nagligad nga semana.
Ginpabutyag ni Treñas nga wala gid siya nakaagi nga nakigkita kay Odicta kag wala man siya sang cellphone number sini.
Ginpanindugan man ni Treñas nga wala sila sang away ni Nava tubtub subong agud mangin rason nga ipapatay niya ang konsehal.
Suno sa kongresista, indi siya bayolente nga tawo kag nagasunod siya sa laye. (JoMaque)