‘Rambol sang mga pamatan-on’
Iloilo City–Ginabanta sa P180,000 tubtub P200,000 ang balor sang kahalitan sa natabu nga rambol sang mga pamatan-on sa Aura Disco Bar sa Smallville Complex, Mandurriao kaina sang kaagahon.
Suno kay alyas Lito, bouncer sang disco bar, kasuhan sang management sang physical injuries kag malicious mischief ang mga suspetsado. Naguba suno sa iya ang mga lamesa sa disco bar bangud ginhimo nga taming sang mga suspek sa ila mga upod nga babaye.
Magluwas sini, nagpanghaboy man sila sang mga botelya gani naigo ang mga biktima kag nalipong. Nabun-an sang buka nga botelya si Michael Cerada, 27-anyos sang Dulunan, Arevalo samtang napilasan sa ibabaw sang kilay si Aira Jane Savillano, 22-anyos sang Alalasan, Lapuz nga naigo sang ginhaboy nga botelya.
Nagapabilin nga preso sa Mandurriao Police Station ang 10 ka mga suspetsado nga ginalakipan sang isa ka menor-de-edad.
Ginkilala ang mga suspetsado kanday Gelfred Benitez, 20 sang Dungon C, Mandurriao; Stephen Debuque, 21 sang Quintin Salas, Jaro; Mark Presidente, 21 sang San Pedro, Jaro; Ian Leysa, 19 kag Peter John Ordinal, 19 lunsay sang Dungon B, Jaro; Felipe Capangyarihan, 20; Jojohn Tanate, 19; Michael Atadero, 22; Cede Pan de Vida, 19; kag alyas Simon, 17, tanan sang Desamparados, Jaro. (AGB)