Bulang sa Rockwell Cockpit Arena sa Lapuz, ginpa-untat bangud wala sang business permit
Iloilo City — Ginpa-untat sang La Paz police ang bulang sa Rockwell Cockpit Arena kahapon matapos natukiban nga wala sang business permit.
Ginkonfirmar ni Senior Inspector Rey Sumagaysay, hepe sang La Paz Police Station nga ginmandu ni Iloilo City Police Office ukon ICPO Director Remus Zacharias Canieso ang pagpa-untat sang bulang.
Suno kay Sumagaysay, gin-istorya niya ang tag-iya nga si Rodrigo Dellomes kag ginpaathag ang rason sang pagpa-untat sa bulangan. May ginpakita suno sa iya ang tag-iya sang resibo nga fully-paid na ini para sa business permit sa 2017 apang wala sang may ginpakita nga dokumento.
Nagkooperar man ang tag-iya kag nagpasalig nga makuha sang kopya sang 2017 nga business permit. Una na ginpabutyag ni Business Permit and Licensing Office ukon BPLO Head Norman Tabud nga wala gin-isyuhan sang business permit ang Rockwell Cockpit Arena bangud nga wala sang franchise. (JoMaque)