Asawa, patay matapos ginpahayag nga gintiro sang iya bana sa Dumangas!
Dumangas, Iloilo–Wala gid natabangan ang asawa nga ginpahayag gintiro sang iya bana sa Barangay Patlad.
May tatlo ka igo sa dughan si Nelia Moreno, 36-anyos, nga gindala pa sa Iloilo Provincial Hospital sa Pototan apang napatay. Ginpanginwala naman sang bana nga si Carmelo Moreno, 43-anyos, nga gintiro niya ang iya asawa.
Gin-ako naman ni Carmelo nga may pusil siya bangud supervisor siya sang security agency sa Iloilo City.
Base sa pag-imbestigar sang Dumangas police, nag-inaway ang mag-asawa samtang nagapauli halin sa baylehan antes natabu ang pagluthang. Preso si Carmelo sa Dumangas Police Station. (AGB)