Subpoena server, patay matapos nalasakan sang truck sa Calinog!
Calinog, Iloilo–Nagsurrender ang driver sang 10-wheeler truck nga naglasak sa subpoena server sa Barangay Barrio Calinog kahapon sang hapon.
Suno kay PSI Kennith Bermejo, hepe sang Calinog Police Station, ginpabutyag sang driver nga si Lirio Castelejo, 53 sang Barangay Libot sa amo man nga banwa, nga wala na siya nakalikaw sang naglabog sa pihak nga lane ang biktima nga si Gil Villanueva.
Nakabunggo sang ido ang ginamaneho ni Villanueva nga motorsiklo kabangdanan nga nagtabog siya kag nalasakan sang truck nga gintunaan sang iya kamatayon.
Si Villanueva ang nagatrabaho sa Municipal Trial Circuit Court sa Calinog. (AGB)