Mga punong barangay sa syudad kag probinsya, lain-lain ang panan-awan sa plano nga pagpa-iway sang Barangay kag SK elections!
Iloilo–Bentaha sa mga maayo nga punong barangay ang plano ni Presidente Rodrigo Duterte nga ipaiway ang Barangay kag Sangguniang Kabataan elections subong nga tuig kag sa baylo mag-appoint sang mga barangay kapitan.
Suno kay Liga Federation President kag Ex-Officio Board Member Pablito Gemarino, bisan kinahanglan ang eleksyon agud magpili sang bag-o nga mga barangay officials, indi naman mabal-an kun ano ang mga paagi sa pag-appoint sang mga punong barangay. Suno pa sa iya, madamo sang mga kapitan ang maislan ilabe na ang drug-affected barangays sa pungsod.
Sa mga kapitan naman suno sa iya nga indi drug-affected ang barangay, wala sang dapat ikahangawa bangud may posibilidad nga ma-appoint sila kun matuman ang plano sang presidente.
Plano ni Gemarino nga konsultahon ang mga ABC presidents sa probinsya agud kuhaan sang reaksyon sa plano nga pagpostpone sang Barangay kag SK Elections.
‘Dapat may eleksyon’
Ginaduso naman ni Liga President kag Ex-Officio City Councilor Reyland Hervias ang paghiwat sang Barangay Elections imbes nga ipa-iway kag i-appoint sang mga mayors ang barangay kapitan.
Suno kay Hervias, indi man tanan nga barangay ang apektado sang illegal nga druga. Dapat naman suno sa iya mapangitaan sang paagi kon paano ma-control ang mga barangay nga may problema sa illegal drugs.
Kon madayon naman ang pagpa-iway sang Barangay Elections, nagpanugyan si Hervias nga i-appoint ang makahimo sang kaayuhan sa barangay. (AGB)