Voters’ registration, nagapadayon!

Iloilo City–Nagapadayon ang registration sang mga Comelec offices bisan indi pa maathag kun madayon ukon indi ang synchronized SK kag Barangay elections sa Oktubre.

Sa City Comelec, ginpahayag ni Jonathan Sayno, Election Assistant 2, nagahimo sila sang off-site registration. Nagakadto ang mga empleyado sang Comelec sa kabarangayan agud mangin mas mahapos para sa mga pumuluyo ang pagparehistro.

Pero duha ka semana antes ang deadline sang registration, magabalik ang Comelec personnel sa ila opisina agud magbaton sang mga gusto magparehistro. Sa Abril 29 ang katapusan nga adlaw sang rehistrasyon.

Sa pag-obserbar ni Sayno, mas epektibo ang pagbisita nila sa kabarangayan bangud mas madamo ang nagapa-rehistro. (AGB)