ArchivesLokal

(UPDATE) Suspetsado nga nagkuha kag naghimulos sa 7 ka tuig nga babaye sa Tigbauan, nag-ako nga nagamitan niya sang tudlo ang bata

Tigbauan, Iloilo — Gin-ako sang suspetsado nga nagkuha kag naghimulos sa pito ka tuig nga babaye sa Brgy. Parara Sur, Tigbauan sang Biernes sang gab-i nga gingamitan niya sang iya nga tudlo ang kinatawo sang biktima.

Suno kay Noel Salarda alyas Dagul, 31-anyos kag residente sang nasambit nga lugar, bukas ang pwertahan sang balay sang biktima sang nagsulod siya. Ginpahayag ni Dagul nga nagatulog si alyas Nene upod ang iya nanay sa katre sa ila kwarto sang ginhakwat niya ini kag gindala sa pihak nga suba.

Nagsinggit suno kay Dagul ang iloy sang biktima sang nagatabok na sila sa suba kag wala niya ini ginsapak bangud malayo na sila. Una na ginpahayag ni Dagul nga wala niya ginhimuslan ang biktima. Suno kay Dagul, gintulok niya lang ang biktima matapos nga gin-ubahan.

‘Nagpangayo sang pasaylo’

Nagpangayo sang pasaylo sa pamilya sang biktima ang suspetsado.  Suno kay  Salarda, nalaw-ayan siya sa iya ginhimo kag ginpabutyag nga nadala lang sang kahulugbon.

Ginpahayag ni Dagol nga wala siya sa iya kaugalingon sang ginhimo ang krimen. Dugang pa niya, nagsulod lang ini sa iya paminsarun matapos nag-inom inom upod ang iya barkada.

Si Dagul nga nagabaligya sang ice cream sa Poblacion sa Tigbauan ang may record sang pagpanglingling suno sa Tigbauan police. Suno naman sa iya nanay nga si Myrna Decomotan,54-anyos, wala nakatapos sa grade 1 ang iya bata.

‘Desidido nga mag-file sang kaso’

Desidido naman ang iloy sang pito-ka tuig nga babaye nga magpasaka sang kasu batuk sa suspetsado. Wala napunggan sang iloy sang biktima ang iya balatyagun sang nakita ang suspetsado kag gintampuyong ini sang nadakpan sa Cagbang, Oton sang Sabado sang gab-i.

Daku ang pagpasalamat sang iloy sang biktima nga nadakpan na si Dagul. Ginpabutyag naman sang iloy nga naga-recover na si alyas Nene sa natabu.

Samtang, ginpreso sa separado nga karsel si Dagul sa Tigbauan Municipal Police Station agud malikawan nga makastiguhan sang iban nga mga preso. Tinguhaan nga ipasaka ang kasu nga rape and sexual assault in relation to child abuse law subong nga adlaw batuk sa suspetsado suno kay Police Senior Inspector Rowena Hubero, hepe sang Tigbauan Police Station. (JoMaque)

Leave a Reply