Environmental Management Bureau, handa nga magbulig sa mga LGUs kasunod sang ‘exploratory learning’ sang mga barangay officials sa Naga kag Legazpi Cities
Iloilo City — Handa ang Environmental Management Bureau sa pagbulig sa mga local government units (LGUs) agud mapatuman ang Republic Act 9003 ukon ang Ecological Solid Waste Management Act of 2000.
Suno kay EMB 6 Director Ariel Gloria, kabahin sang ila role ang pag-edukar sa mga LGUs kag pag-assist sa anuman nga paagi para lubos nga ma-implementar ang laye. Naga-coordinate man ang EMB sa National Solid Waste Commission kag Environmental Ombudsman agud masiguro nga gina-implementar sang mga LGUs ang laye.
Gin-athag ni Gloria nga daku ang papel sang LGUs ilabe na sang mga barangay officials sa pagpatuman sang solid waste management. Ginhalimbawa naman ni Gloria ang barangay sa Jordan Guimaras nga maayo nga ehemplo sang pagpatuman sang RA 9003 kag ginagamit sang EMB sa pag-showcase sa iban nga LGU bangud maayo ang solid waste management.
Sang nagligad nga semana, nagasto sang tag-26 mil 650 pesos ang kada barangay sa syudad nga nag-upod sa exploratory learning sa Naga kag Legazpi Cities. Ginrason ni Liga president kag ex-officio City Councilor Reyland Hervias nga nag-obserbar sila sang best practices sang mga barangay sa duha ka syudad pareho sang solid waste management nga mahimo nila sundon sa ila tagsa ka barangay. (JoMaque)