Philippine Coast Guard, ginrekomendar ang paggamit sang GIFT sa Parola area

Iloilo City — (UPDATE) Ginrekomendar sang Philippine Coast Guard ang pagamit sang Guimaras-Iloilo Ferry Terminal sa Parola area.

Suno kay Coast Guard-Iloilo Station Commander Ramil Palabrica, pwede na nga magamit ang GIFT kag pamatuod ang madinalag-on nga una nga adlaw sang dry run kahapon. Mabalik lang suno kay Palabrica ang mga pumpboats sa daan nga dulungkaan kon low tide ukon hunas.

Gin-athag naman ni Palabrica nga nasabat ang ila mga pangduha-duha sang una sang nag-inspect sila sang damlag lang upod sa mga opisyal sang local government unit sang Guimaras kag Iloilo City kag mga mga miembro sang pumpboat associations sa Jordan kag Guimaras.

‘Good observation’

Maayo ang obserbasyon sang isa sa mga kapitan sang pumpboats sa una nga adlaw sang dry run sa GIFT. Mahapos ang pagsaka kag pagpanaug sang mga pasahero suno kay Jasper Develos bangud nga high tide.

Pero nagakabalaka si Develos kon matabuan nga low tide bangud indi sila makadungka sa GIFT. Ginpa-athag sini nga manabaw ang area sa atubang sang GIFT gani mabara sila kon magdungka nga hunas. Mabalik gihapon ang mga pumpboats sa ila daan nga ginadungkaan kon low tide.

Mabudlayan man ang mga pasahero suno kay Develos kon low tide bangud sa terminal sila magawad sang ticket pero malakat pa sang halos 200 metros pakadto sa daan nga dulungkaan. Magalawig ang dry run sa GIFT tubtob subong nga adlaw. (JoMaque)