NIPSC President Naglain Ang Buot Kay Former Congressman Junjun Tupas Sang 5th District
Province of Iloilo – Gin-ako ni Northern Iloilo Polytechnic State College President Maria Theresa Palmares nga naglain ang iya buot kay former congressman Junjun Tupas sang 5th district.
Kasunod ini sang pagtawag suno sa iya sang anay kongresista nga iresponsable nga presidente sa Facebook matapos ang kontrobersiya sa iskolar sang quinto nga programa ni Tupas.
Nag-ugat ang isyu sang wala ginrelease sang NIPSC ang mga credentials sang mga iskolar ni Tupas. Una na ginpa-athag ni palmares nga ginhimo ini samtang wala pa nag-abot ang reply sang Office of the Solicitor General sa iya pamangkot kon ano ang himuon sa wala nabayaran nga tuition fees sang mga iskolar.
Ginpahayag ni Palmares nga wala niya na lang ginsapak ang mga Facebook posts ni Tupas bangud indi niya luyag nga magbinastos sila sa social media.
Base sa nabaton ni Palmares nga audit observation memo sang Commission on Audit, may masobra 74 million pesos pa nga collectibles ang NIPSC sa iskolar sang quinto.
(Aljohn Torreta)