2 patay sa drug buy bust operation sa Zarraga!

Zarraga, Iloilo–Patay ang duha ka ginapatihan nga drug personalities sang ginpahayag nagbatu sa mga pulis sa drug buy bust operation sa Barangay Poblacion Ilaya kaina sang udto.

Ginkilala ni PSINSP Robert Jason Pancha, team leader sang Provincial Drug Enforcement Unit sang IPPO, ang subject sang operation nga si Charles Lubao sang Roxas City, Capiz. Una nga gindala sa ospital si Lubao apang gindeklarar nga dead-on-arrival.

Nabilin sa lugar ang bangkay sang iya upod nga sang ulihi ginkilala kay Billy Juanico alyas Jimboy sang Roxas City, bangud sa gina-uyatan sini nga granada.  Sang nag-abot lang ang SOCO kag Explosive and Ordnance Division ginkuha ang granada kag ang dala sini nga backpack.

Suno kay Pancha, gintiro ni Lubao ang pulis nga tuyo magdakup sa iya apang wala naigo gani nagbalus ang ulihi kag naigo sa dughan si Lubao. Na-recover sa duha ang 24 ka sachets sang suspected shabu lakip na ang buybust item kag ang 500 pesos nga marked money. (AGB)