Former City Councilor kag subong National Youth Commission Executive Director Lex Tupas, nag-ako nga gina-engganyo ni Cong. Jerry Treñas nga magsaylo sa PDP-Laban
Iloilo City–Ginkumpirmar ni former Councilor Lex Tupas nga ginsapol siya ni Congressman Jerry Treñas agud engganyuhon nga magsulod sa PDP-Laban.
Suno kay Tupas, upod niya nga nag-istorya sa kongresista ang iya asawa nga si Councilor Candice Tupas kag si Councilor Jeffrey Ganzon.
Halin pa sang nagligad nga bulan suno sa iya naghingyo si Treñas nga makit-anay sila apang masako siya sa trabaho bilang executive director sang National Youth Commission kag kahapon lang naka-tiempo. Nagapati si Tupas nga kabahin sang preparasyon sang partido sang administrasyon para sa masunod nga eleksyon ang pag-engganyo ni Treñas sa mga konsehal sa syudad.
Konsultahon naman sang mag-asawa nga Tupas ang ila pamilya kag mga supporters antes magdesisyon.
Gin-athag sang anay konsehal nga indi lang basta kadalag-an sa politika ang dapat nga ikonsiderar sa pagsaylo sang partido kundi para man sa kaayuhan sang syudad. (AGB)