Balor sang kahalitan sa Lopez Jaena Norte, La Paz, naglab-ot sa halos P10-million
Iloilo City — Halos 10 milyones pesos ang balor sang kahalitan sang sunog sa Barangay Lopez Jaena Norte, Lapaz kahapon. Suno kay Evelyn Olano, social worker sa Lapaz, naglab-ot sa 9, 857, 500 pesos ang balor sang kahalitan sa sunog nga nagtupok sa 52 ka balay samtang 4 ang partially gutted.
Temporaryo nga nagatiner sa Day Care Center kag covered court sang barangay kag mga simbahan ang 276 ka mga apektado nga residente suno kay Olano. Dugang niya, nagtiner naman sa ila mga himata ang pila sa mga nasunugan. Wala sang casualty sa sunog apang ginpahayag nga may napilasan kag napaso.
Makabaton sang 5,000 pesos ang pamilya nga totally gutted ang balay suno kay Olano samtang 2,500 pesos naman ang sa may partially gutted.
Una na ginreport nga electrical ang gintunaan sang sunog suno kay City Fire Marshall Jerry Candido. Ginatudlo naman ni Lopez Jaena Norte, Lapaz Punong Barangay Marjorie Gregorios nga naghalin ang sunog sa nag-spark nga kuntador sa poste sang Panay Electric Company ukon PECO. (JoMaque)