Drug test result sang 5 ka mga city councilors, nag-negatibo
Iloilo City — Negatibo ang resulta sang drug test sang lima ka city councilors. Ginkonfirmar ni Councilor Jay Treñas nga naghagaday sila nanday Councilors Love Jam Baronda, Inday Lee Zulueta-Salazar, Ely Estante kag Liga President kag ex-officio Councilor Reyland Hervias nga magpa-drug test kahapon.
Lunsay negatibo ang resulta sang ila drug test suno kay Treñas. Ginpahayag sini nga tuyo nila ipabalo sa publiko nga matinlo ang konseho.
Wala pa nakapa-drug test ang iban nga konsehal. Una nga nanghangkat si Councilor Plaridel Nava nga magpa-drug test sila sa konseho agud mangin maayo nga ehemplo. Pero ginduso sini ang test gamit ang dugo ukon hair strand para indi dali-dali nga madula ang trace sang illegal drugs.
Nanghangkat si Nava matapos nagpangayo si Mayor Jed Patrick Mabilog sang otoridad sa city council nga magsulod sa kasugtanan upod sa PDEA 6 kag ospital para sa drug rehabilitation program. (JoMaque)