Mga miembro sang City Council, ginhangkat ni Councilor Plaridel Nava nga magpa-drug test

Iloilo City–Indi sigurado si Councilor Plaridel Nava kun sabton sang iya mga kaupod sa City Council ang iya hangkat nga magpa-drug test sila.

Suno sa konsehal, wishful thinking lang ang iya paghangkat matapos nagpangayo sang authority si Mayor Jed Patrick Mabilog sa konseho nga magsulod sa kasugtanan sa Philippine Drug Enforcement Agency kag isa ka ospital para sa drug rehabilitation program sang syudad. Mas mapatihan suno kay Nava ang pagduso nila sang drug rehabilitation program kag pagsuporta sa anti-drug campaign sang Duterte administration kun sila nga mga opisyal ang matinlo sa illegal drugs.

Ginaduso ni Nava nga magpa-drug test ang mga city councilors paagi sa dugo ukon hair strand para indi dali-dali nga madula ang traces sang illegal nga druga.

Nagapati si Nava nga indi pa ulihi ang tanan agud magpa-drug test sila bangud sa iya nga pagkahibalo, indi pa clear ang syudad sa illegal drugs.

Gintumod sang konsehal ang pagtawag ni Presidente Rodrigo Duterte nga ‘most shabulized’ ang Iloilo. Suno kay Nava, dapat naman nga tutukan ang pagtinlo sa mga drug users bangud indi na masyado ka lala subong ang narco politics. (AGB)