ArchivesLokal

(UPDATE) Illegal electrical connection, gintumod sang BFP nga ginhalinan sang sunog sa Lapaz

Iloilo City–Na-establisar nga illegal electrical connection ang ginhalinan sang sunog sa Lopez Jaena Norte, Lapaz kahapon sang kaagahon.

Ini ang naguwa sa imbestigasyon sang Bureau of Fire Protection suno kay Punong Barangay Marjorie Gregorios. Nagsugod suno sa iya ang sunog sang nag-igrab ang kuntador sa poste kag nahulog ang baga sa balay ni Tessie Jaena nga human sa light materials. Madasig nga naglaton ang kalayo sa iban nga mga balay nga lunsay human sa light materials.

Gin-ako naman ni Gregorios nga madugay na nga problema sa barangay ang mga nagatakod sang ‘jumper’ bisan makapila ka beses na siya nga nagpangabay nga untatan.

Bangud sang daku nga sunog, nagpasalig si Gregorios nga magabantay agud wala na sang illegal electrical connection sa barangay.

‘Wake-up call’

Magaserbe naman nga wake-up call sa mga pumuluyo ang daku nga sunog. Suno kay City Fire Marshal FSUPT Gerry Candido, base sa ila statistics, 40 tubtob 50% sang ginhalinan sang sunog ang electrical.

Dapat nga untatan ang illegal connections suno kay Candido bangud delikado kag makatupok sang ginpundar nga propedad kag kabuhi kon may sunog. (AGB)

Leave a Reply