Mga Antiqueños, naga-enjoy gid sa pag-host sang Palarong Pambansa suno sa APPO

Iloilo City — Gina-enjoy sang mga Antiqueños ang paghost sang Palarong Pambansa 2017. Sa pag-obserbar ni SPO2 Vicente Silla, OIC sang APPO-Internal Affairs Service, nagakooperar gid ang mga pumuluyo agud mangin madinalag-on ang event.

Ginpadayaw ni Silla nga halos wala sila sang narecord nga mga insidente bangud sa pagkadisiplinado sang mga tawo. Wala naman nasundan ang pagpangawat sa mga delegado matapos nadakpan ang mga suspek nga nagkuha sang kagamitan sang pila ka atleta sang Western Visayas.

Natalana buwas sa hapon ang opening ceremony sang ika-60 nga edition sang Palaro kag guest of honor si Presidente Rodrigo Duterte. Una na ginpabalo ni Governor Rhodora Cadiao nga madamo sila sang sorpresa sa mga delegado kag bisita sa opening.  Magahiwat naman karon sa gab-i sang Governor’s Night bilang pag-abi-abi sa mga bisita. (JoMaque)