Cabatuan Mayor Ronilo Caspe, nagpasalig nga buligan ang 25-anyos nga babaye nga may diperensya sa paminsaron
Cabatuan, Iloilo — (UPDATE) Nagpasalig si Cabatuan Mayor Ronilo Caspe nga buligan ang 25 anyos nga babaye nga may deperensiya sa paminsaron sa Tigbauan Road, Cabatuan. Suno kay Caspe, makapila ka beses nga nagpangayo sang bulig sa munisipyo sang Cabatuan ang ginikanan sang dalaga nga ginpahayag na-apektuhan ang utok bangud ginpagamit sang illegal drugs sang iya mga boardmates samtang naga-eskwela pa sadtu sa syudad.
Suno kay Caspe, ginrekomendar niya nga ipabulong ang dalaga agud madeterminar kon ano ang masunod nga tikang. Una na nga nag-ayo ang ginikanan nga ipakay-o ang ila balay bangud ginpahayag nga ginaguba sang babaye.
Nagpasalig ang Department of Health 6 paagi kay Dr. Joji Jimenez sang bulig sa medical nga kinahanglan sang dalaga. Ginkadenahan sang iloy ang tuo nga tiil sang dalaga bangud sa iya pagpanghalit. (JoMaque)